अर्थक्रांती भाग 8

पैसा वसे मनी…
भाग ०१ – पैसा गरज, अपेक्षा, वास्तव, समज व गैरसमज
------------------------------------------
८.१ श्रीमंतीच्या वाटेवर
------------------------------------------
एका शाळेत मुलांना गरीबीविषयी निबंध लिहायला लावला. त्यात एका विद्यार्थ्याने गरीबी काय असते ते कधीच अनुभवलेले नसते. तो विद्यार्थी निबंध लिहतो की – एक माणूस अतिशय गरीब असतो. त्याच्याकडे कामाला असणारे नोकरचाकर सुध्दा गरीब असतात. त्याचा कार ड्रायव्हर सुध्दा गरीब असतो. त्यांनी विकत आणलेल्या कुत्र्यांना शिळा ब्रेड खावा लागतो. त्याची बायको तिच्या नोकरांना अर्धाच पगार देत असते. त्याच्या बंगल्यात पाणी मारण्यासाठी पाईप सुध्दा लहान असते. त्यांच्याकडे झोपायला असणारी गादी व बेड जुने झालेले असतात. जेवण बनवणारा सुध्दा गरीबच असतो. अशा पध्दतीने तो मुलगा निबंध पूर्ण करतो, कारण त्याच्या गरीबीच्या कल्पनेत सुध्दा श्रीमंती असते. तशी श्रीमंतीची लक्षणे आपल्यात भिनली, की आपण श्रीमंतीच्या वाटेवर प्रवास करु लागतो.

जशी गरीबीची व गरीबाची काही लक्षणे असतात. तशी ती श्रीमंताची व श्रीमंतीची सुध्दा असतात. एकदा आपल्याला श्रीमंतीची लक्षणे माहिती झाली आणि त्याप्रमाणे वागले तर निश्चितच आपला प्रवास श्रीमंतीच्या वाटेवर व्हायला लागतो. आधी श्रीमंतीची लक्षणे येतात, मगच गरीब असलेला माणूस श्रीमंत होतो. त्यामुळे आपल्याला श्रीमंतीची लक्षणे जाणून घ्यावी लागतील, मग ती आचरणात आणावी लागतील.

श्रीमंताची लक्षणे जाणून घेऊ या, मग श्रीमंतीची लक्षणे जाणून घेऊ या. ज्याच्याकडे खायला पोटभर अन्न आहे. राहायला चांगले घर आहे, मग ते भाड्याचे का असेना (त्याचे भाडे भरण्याएवढे पैसे त्याच्याकडे कायम असतात.) चालेल; उत्तम आरोग्य आहे. मुलांना त्यांच्या योग्यतेप्रमाणे शिक्षण देणे शक्य आहे, म्हातारपणी रिटायरमेंटची व्यवस्था करुन ठेवलेली आहे; म्हणजेच रिटायर झाल्यावर दरमहा किमान खर्चापुरते पैसे येण्याची व्यवस्था करुन ठेवलेली आहे. गरज असल्यास दुचाकी व चारचाकी गाडी ज्याच्याजवळ आहे. आपल्या इच्छित स्थळी फिरायला जाता येते. आपल्याला आवडणारी पुस्तके किंवा ज्ञान मिळवण्याची साधने खरेदी करता येतात. जीवनातील गरजेच्या वस्तू खरेदी करता येतात. विनाकारण होणारे शारीरिक कष्ट कमी अथवा दूर करता येतात. अशी आणखीही काही श्रीमंताची लक्षणे आहेत.

जशी श्रीमंताची काही लक्षणे असतात. तशीच श्रीमंतीची सुध्दा काही लक्षणे असतात. पैशावर प्रचंड प्रेम असणे किंवा जीवनातले पैशाचे महत्त्व योग्य रितीने समजावून घेतल्यामुळे पैशाचा तिरस्कार न करता तो मिळवण्याचे प्रयत्न करणे, त्यासाठी प्लॅन तयार करणे, गरजेच्या वस्तू खरेदी करणे, त्यापासून होणारे लाभ वेळीच मिळवणे. श्रमाच्या बदल्यात पैसे देऊन काम करुन घेणे, पैशाच्या माध्यमातून पैसे निर्माण करणे, श्रीमंत लोकांमध्ये वावरणे, श्रीमंतासारखे वागणे, गरीब श्रीमंत असा भेदभाव न करता प्रत्येक व्यक्तीशी चांगली वागणूक ठेवणे, गरीबीचा तिटकारा असणे, गरीबाबद्दल थोडासुध्दा द्वेष मनात न बाळगणे, पैशाची योग्य ठिकाणी गुंतवणूक करणे, सर्व गुंतवणुकीचा व्यवस्थात रेकॉर्ड ठेवणे, विचार करुन पैसे खर्च करणे, खिशात, पाकिटात व बँकेत कायम पैसे शिल्लक असणे. नवीन गोष्टी शिकण्यासाठी सदैव तयार असणे, नातेवाईकांसोबत चांगले वागणे ही श्रीमंतीची लक्षणे आहेत. आपल्यामध्ये सध्या असणारी गरीबीची लक्षणे दूर करुन श्रीमंतीची लक्षणे अंगीकारण्याचा प्रयत्न करणे. थोडे थोडे पैसे बचत व गुंतवणूक करणे. आपल्या गुंतवणुकीसाठी नवीन पर्यायाचा शोध घेण्याची सतत धडपड ठेवली पाहिजे. श्रीमंतीची लक्षणे स्वीकारली की आपला प्रवास श्रीमंतीकडे व्हायला लागतो.

आपल्या मित्रांसोबत व नातेवाईकांसोबत पैसे निर्माण करण्याचे व वाढवण्याचे प्लॅन तयार करणे. त्यांना ते प्लॅन सांगणे. पैसे येण्याऱ्या गोष्टींना प्रोत्साहन देणे. शेअर बाजार, गुंतवणूकदार, व्यवसाय, व्यवसायातील भागीदारी, बँका, पतसंस्था, मुदत ठेव (एफडी), आवर्ती ठेव (आरडी), सरकारी रोखे (गव्हर्नमेन्ट बाँड), सोने, विमा, आरोग्य विमा, मेडीक्लेम, सामाजिक कार्य यासारख्या महत्त्वपूर्ण विषयात पैशाची गुंतवणूक करुन त्यातून अजून पैसे निर्माण करणे ही श्रीमंतीच्या वाटेवरची खऱ्या अर्थाने वाटचाल आहे. श्रीमंत लोकांसोबत चांगले संबंध ठेवणे, आपल्या मित्रांसोबत चांगले व्यवहार करणे, अर्थशास्त्राचा अभ्यास करणे. स्वतःचा वेळ व बुध्दी वापरुन पैसे कमावण्याबरोबरच इतरांचा वेळ, श्रम व बुध्दी वापरुन पैसे निर्माण करणे ही श्रीमंतीच्या वाटेवरची पावले ठरतात.

- अमोल चंद्रकांत कदम, संपादक, नवी अर्थक्रांती
#rich #money #पैसा #गरीब #श्रीमंत